ИИМ: 7-апрелде борбордук көчөлөрдө унаа кыймылына чектөө коюлат

Апрель элдик революциясынын 7 жылдыгына арналган иш-чаралардын жүрүшүндө айрым борбордук көчөлөрүндө унаа кыймылына чектөө киргизилет. Бул тууралуу ИИМдин басма сөз кызматы билдирди.

Маалыматка караганда Киев көчөсү менен Чүй проспектисинин Эркиндик бульвары менен Тоголок Молдо көчөсүнүн аралыгы жабылат. Ошондой эле Фрунзе көчөсүндөгү Раззаков, Орозбеков, Панфилов жана Эркиндик бульварынын аралыгында унаа кыймылы убактылуу токтотулат.

"Коопсуздукту жана тартипти сактоо үчүн милиция кызматкерлери 6-апрелден тартып күчөтүлгөн режимде иш алып барышат. Алдын ала профилактикалык ыкчам изилдөө иш аракеттерин жана коомдук саясий кырдаалдарга жол бербөө үчүн ыкчам штаб түзүлдү", - деп айтылат маалыматта.

Автор: Айпери Ганыжан кызы