Бишкекте баңги затын жарнамалаган баннер алынды

Кечээ, 21-ноябрда Бишкекте шаар тургундары "баңги затын жарнамалап жатат", - деп нааразы болгон жарнамалык баннер алынды. Бул тууралуу шаардык мэриянын басма сөз кызматынан билдиришти.

Ага ылайык, көрнөк-жарнак тактайы Курманжан Датка көчөсү менен Чүй кең көчөсүнүн кесилишинде жайгашкан.

"Бизге шаар тургундары аталган баннердеги жарнаманын QR-коду баңги затын жарнамалаган сайтка шилтеме экенин айтып кайрылышты. Бишкек шаарынын мэриясынын жер пайдалануу жана курулуш башкармалыгы "Тазалык" бригадасы менен биргеликте аталган баннерди демонтаж кылышты", - деп айтылат маалыматта.

Маалым болгондой, жарнамалык баннердин ээси жеке компания. Аларга баннер турган жер тилкеси 2022-жылга чейин ижарага берилгени белгилүү болду.

Автор: Бактыгүл Султаналиева