Гапар Айтиев атындагы кыргыз улуттук көркөм-сүрөт музейине жаңы жетекчи дайындалды

Гапар Айтиев атындагы кыргыз улуттук көркөм-сүрөт музейине Мамбетказиева Айгүл Токтобековна жетекчи болуп дайындалды. Тиешелүү буйрукка маданият, маалымат жана туризм министри Азамат Жаманкулов кол койду.

Айгүл Мамбетказиева 1955-жылы туулган. Ал Кыргыз мамлекеттик университетинде билим алган.

Эмгек жолун 1978-жылы Гапар Айтиев атындагы кыргыз улуттук көркөм-сүрөт музейинде баштаган. Тагыраагы, 1978-1980-жылдары - экскурсовод, 1980-1986-жылдары декоративдик искусство бөлүмүнүн илимий кызматкери, 1986-жылдан бүгүнкү күнгө чейин музейдеги башкы сактоочу болуп иштеген.

Жетекчилик кызматка дайындалганга чейин директордун орун басары болгон. Айгүл Мамбетказиева музей иштери боюнча республикалык эксперт.

Гапар Айтиев атындагы кыргыз улуттук көркөм-сүрөт музейинде өткөн сүрөт көргөзмөдөн кийин көпчүлүк нааразычылыгын айтып чыккан. Музейдин жетекчиси Мира Жангарачева нааразычылыктардан кийин 2-декабрда жумуштан кетүү тууралуу арыз жазган.
Философия илимдеринин кандидаты, доцент Мира Жангарачева ушул жылдын июнь айында Гапар Айтиев атындагы Кыргыз улуттук көркөм-сүрөт музейине директор болуп дайындалган эле.