"Оорубаңыздар достор!". Коронавирус инфекциясы аныкталган парламенттин басма сөз кызматынын жетекчиси азыркы абалы тууралуу үн катты

Кечээ, 18-июнда парламенттин басма сөз кызматынын жетекчиси Ибрагим Нуракун уулунан коронавирус инфекциясы аныкталганы кабарланган. Учурда ал Токмок шаарындагы ооруканада дарыланып жатканын өзүнүн социалдык тармактагы баракчасына жазды.

"Урматтуу досторум, кечээтен бери жакшы каалоо-тилектериңиздерди аябапсыздар, ыраазылык билдирем. Учурда Токмок шаарындагы ооруканада дарыланып жатам. Түндө "Маша и медведь" мультфильминдегидей "Тез жардам" унаасы менен ушул жакка алып келишкен. Унаа, имараттар эски болгону менен биздин дарыгерлер түз маанисинде эле алтын экен. Демим кысылып баштады эле дароо капельница коюп, абалымды жакшыртышты. Эки медайым, эки дарыгер тынымсыз кароого алууда. Абдан сылык, бетин көрө албайм, бирок үндөрүндө оптимизмдин духу сезилип турат. Доктурларыбыздын талыкпас эмгегин карап туруп эле айыгып кетчүдөйбүз буйруса.

Ал эми мени ушул тапта бакытка бөлөп турган дагы бир жаңылык, жумушумда жакын иштеген кесиптештеримдин бардыгынын ПЦР-тести таза чыкты. Өткөн аптада "Парламентаризм сабактары" талкуусуна катышкан эки депутат Каныбек Иманалиев менен Акылбек Жапаровдун дагы анализдери таза чыкты. Жаңы эле кесиптештерим ушул жаңылыкты айтышып, чексиз кубанычка бөлөштү. Дене табым бир аз эле көтөрүлөөрү менен үйдөн чыкпай иштегеним эң туура кадам болгон экен. Эми сүйүктүү жубайым, эки кичинекей баламдын анализи да жакшы болсо экен деп, Кудайдан тилеп олтурам. Оорубаңыздар, достор!" - деп жазган ал.

Автор: Азат Бейшенбеков