Бир күндө 4 чыныдан ашык чай ичүү ден соолукка зыян экендиги айтылды

Орусиялык диетолог Елена Соломатина бир күндө 4 чыны гана чай ичүү керектигин, эгер андан көп чай ичсе ден соолукка зыян болорун билдирген. Бул тууралуу орусиялык басылмалар жазып чыгышты.

Ал белгилегендей, мындай чектөөлөр нервдик дүүлүгүүсү барларга тиешелүү. Өзгөчө чайды демдөөгө көңүл буруу зарыл.

"Бир күндө 4 чыныдан ашык чай ичпөө максатка ылайык. Бирок ал чайды демдөө даражасына, чайдын сапатына жана адамга жараша болот", - деген ал.

Чай - заара чыгаруучу суусундук, ошондуктан суюктуктун толукталышын көзөмөлдөп туруу зарыл. Аны кайнак суу менен демдебеш керек. Пайдалуу компоненттердин сапатын жоготуп албоо үчүн жылуу суу менен демдөө зарыл.

Ошондой эле кан басым көтөрүлгөндө, психикалык ооруларда чай жана кофени ичүү туура эмес.

Ошол эле учурда чайдан толук баш тартуу максатка ылайык эмес, себеби анда адамдын организмине керектүү пайдалуу витаминдер, антиоксиданттар, танин жана теанин бар.

Автор: Айжанар Рыспек кызы