Өлкөнүн жаш футболчулары дүйнө чемпиондугун жеңиш менен башташты

Кыргызстандын 15 жашка чейинки балдар курама командасы Азербайжандын Баку шаарында өтүп жаткан ФИФАнын өспүрүмдөр арасындагы дүйнө чемпиондугун жеңиш менен баштады.

Кыргыз футбол бримдиги кабарлагандай, бүгүн, 24-октябрда өлкөнүн жаш оюнчулары алгачкы атаандашы болгон Уганда курамасы менен беттешип, 4-3 эсебинде утушкан. Нурэл Асылбеков жана Элхан Мыйманбаев каршылаштын дарбазасына бирден гол киргизишсе, ал эми Байэл Жанышбеков эки гол киргизген.

Белгилей кетсек, мелдеш 2011–2012-жылдары туулган футболчулардан куралган 190 команда катышып жатат. Оюндар кичирейтилген футбол талааларында 8ге 8 форматында өткөрүлүүдө. Катышуучулар 32 тайпага бөлүнгөн. Кыргызстандын курамасы бул биринчиликке алгачкы жолу катышууда. Команда кийинки беттешин Экваториалдык Гвинеяга каршы өткөрөт.

Автор: Кылымбек Бейшеев
Фото: Кыргыз футбол бримдиги