Менин жерим: "Суу алдында калган айыл". Токтогулдун айтылуу Кара-Жыгач айылы тууралуу баян кылабыз

"Менин жерим" рубрикасынын бул жолку чыгарылышында Жалал-Абад облусунун Токтогул районундагы Кара-Жыгач айылы тууралуу сөз болот. Айылдын өзгөчөлүктөрү, климаты, элдин чарбачылыгы жөнүндө SUPER.KG порталына жергиликтүү тургун Адина Молдоярова баяндап берди.

Кара-Жыгач айылы Ош-Бишкек жолунун ортосунда, Нарын дарыясынын жээгинде жайгашкан. Айылда болжолдуу 3 миңден ашык калк жашайт.

"Кызыл-Жазы айылын суу басып, эл ушул Кара-Жыгачка көчүрүлөт...

Биздин айылдын тарыхы ушундай башталат. Аты эле айтып тургандай айылыбыздын ордунда жалаң кара жыгачтар өсүп турчу экен. ГЭС курула турган болуп, Кызыл-Жазы айылын көл баскан соң, эл Кара-Жыгачка көчүп келишет. Кара-Жыгач таштак жер болуп, буудай аңызы болчу экен. Кара жыгачтар көп болгон себептүү айылыбыздын аты да ошондой аталып калган. Улуулардын айтканы боюнча айылдын аталышы тууралуу ар кандай уламыштар да бар.

Биздин айыл деңиз деңгээлинен 3000 метр бийиктикте, негизинен, тоолуу аймакта жайгашкан. Тоолуу аймактын күнгөй тарабында жайгашкандыктан кышы жылуу, жайы ысык. Айылдын түштүк-батыш тарабынан Нарын дарыясы агып өтөт, ушул себептен да кышында маал-маалы менен шамал болуп, кар токтобойт. Климаты кургакчыл. Башка айылдардан айырмаланып, айылыбыз Бишкек-Ош жолуна жакын жайгашкандыктан башка региондор менен транспорт байланышында маселе жаралбайт".

Айыл эли негизинен мал чарбачылыгы, дыйканчылык менен алектенишет. Жайкысын жайлоого чыгышат.

"№20 Турдалы Жүндүбаев мектеби. Бул мектеп 2009-жылы ачылган. Ага чейинки мектебибиз Аскердик бөлүктүн мекемесине өткөрүлгөн. Мектебибизде эл агартуунун мыктылары эмгектенишет. Кыргыз Республикасынын Эл мугалими, сыймыктанган агайыбыз Бекмырза Батыркулов агайдын да эмгеги сиңген".

Айылдык китепкана. "Бир адамдан бир китеп" долбоорунун негизинде жаштар тарабынан китептер чогултулуп, китепкананын китептери жаңыланып, жаңы китептер менен толукталган.

Айыл жаштарынын демилгеси менен футбол аянтчасы ачылган. Жаштар тарабынан ар кандай спорттук иш-чаралар өткөрүлүп турат.

"Сезим келечеги" балдар бакчасы.

Айылдык медициналык пункт.

"Айылыбыздын сыймыктана турган кызы Бактыгүл Чотурова дал ушул айылда төрөлүп өскөн. Акындын көлөмдүү эмгектеринин бири "Суу алдында калган шаар" аталышындагы публицистикалык китеби. Эже бул китебинде Кетмен-Төбө өрөөнүнүн тарыхын изилдеп, илимий изилдөөлөргө таянып жазган. Биздин Кара-Жыгач айылы тууралуу да кызыктуу маалыматтар камтылган. Эже бул китеби тууралуу өз сөзүндө: "Суу алдында калган шаар" китебим Токтогул элинин, жеринин ички трагедиясын баяндайт..." дейт", - деп баяндап берди Адина Молдоярова.

Айылдык мечит.

Айылда Аскердик бөлүк жайгашкан. Бул бөлүктүн милдети "Камбар-Ата" ГЭСин көзөмөлгө алуу.

SUPER.KG порталы сиздин айылыңыз тууралуу кызыктуу баяндаманы чагылдырууга даяр. Сиз жашаган айылда же шаарда кооз жаратылыш, тарыхый баалуу жай, өнөрлүү адамдар барбы? Балким эл уга элек, көрө элек көп кызыктар сиздин айылыңызда бар чыгар. Аны бардык окурмандарга бөлүшүүнү, жумурай журтка жарыялоону сунуш кылабыз. Урматтуу окурман, сиз да айылыңыз тууралуу сыймыктанып айтып бергиңиз келеби? Анда SUPER.KG порталына +996 779 473 939 номерине WhatsApp аркылуу маалымат, сүрөт, видео жөнөтүңүз.

Ар бир айыл атак-даңкка татыктуу!

Автор: Айжанар Рыспек кызы