Коопсуздук үчүн. Бишкектеги "Ала-Тоо" аянтында жарандардын жүрүүсүнө чектөө киргизилди

Бишкек шаардык мэриясы "Ала-Тоо" аянтында, тагыраагы, Чүй кең көчөсүнүн Эркиндик бульварынан Панфилов көчөсүнө чейинки бөлүгүндө кечкисин жүрүүгө чектөө киргизди. Аталган мекеменин маалыматына ылайык, чектөө бүгүн, 21-декабрдан 2021-жылдын 8-январына чейин күчүндө болот.

Маалым болгондой, кечки саат 20:00дөн түнкү саат 01:00гө чейин жарандардын кыймылына чектөө киргизилет. Мындай чечимге шаардын мэринин милдетин аткаруучу Балбак Түлөбаев кол койду.

"Шаар тургундарынын жана борбор калаанын меймандарынын коопсуздугун камсыздоо жана эл көп топтолгон жерлердеги коомдук тартипти сактоо максатында кыймыл-аракетке чектөө киргизилди", - деп айтылат маалыматта.

Автор: Бактыгүл Момбекова