Шайлоого карата коомдук тартипти сактоого 11 миңден ашуун милиция кызматкери тартылат

Ички иштер министри Улан Ниязбеков алдыда өтө турган шайлоого көрүлүп жаткан даярдыктар жөнүндө онлайн жыйын өткөрдү. Бул тууралуу аталган министрликтин басма сөз кызматынан билдиришти.

Маалыматка ылайык, ушул жылдын 4-январь күнү Ички иштер министри Улан Ниязбеков алдыда өтө турган президенттик шайлоону өткөрүү маалында коомдук коопсуздукту камсыздоо боюнча өлкөнүн бардык 7 облусунун жана Бишкек, Ош шаарларынын ички иштер органдарынын бир катар жетекчилерине онлайн жыйын өткөрдү.

"ИИМдин атайын буйругуна ылайык президенттик шайлоону өткөрүү маалында коомдук коопсуздукту камсыздоо максатында 8-январдан баштап ички иштер органдарынын кызматкерлери күчөтүлгөн даярдыкка өткөрүлөт. Атайын иш пландарга ылайык, 11 миңден ашуун кызматкерлер коомдук тартипти сактоого тартылат. Шайлоо тилкелерине бөлүнгөн 5 миңден ашуун кызматкерлер аныкталып, шайлоо тилкелерин толугу менен кайтарууга алышты. Шайлоого даярдануу жана өткөрүү маалында иш-чараларды аткаруу милдеттерине көмөк көрсөтүү максатында БШК менен иш алып баруу үчүн ИИМдин кызматтарынан кирген жумушчу топ ишмердүүлүгүн жүргүзүүдө",- деп баса белгиледи министр.

Ошондой эле, 2021-жылдын 2-январында "Учкун" ААКтын имаратында Кыргыз өлкөсүнүн президентин мөөнөтүнөн мурда шайлоону өткөрүү жана Кыргыз Республикасынын референдумун өткөрүү үчүн даярдалган бюллетендерди өлкөнүн 7 облустук, Бишкек жана Ош шаардык аймактык шайлоо комиссияларына, ошондой эле чет өлкөдөгү участокторго кабыл алуу жана өткөрүп берүү иш-чаралары өткөрүлгөндүгү жазылат маалыматта.

Автор: Гүлдана Мамадали кызы