Белгилүү орусиялык актёр Василий Лановой коронавирустан каза болду

СССРдин Эл артисти Василий Лановой 87 жашында мезгилсиз дүйнөдөн кайтты. Бул тууралуу орусиялык басылмалар жазып чыгышты.

Анда жазылган маалыматка ылайык, актёр январь айынын башында байбичеси Ирина Купченко менен бирге COVID-19 илдети менен ооруканага жаткырылган. Кийинчерээк анын оорусу күчөп кеткен. 28-январда Василий Лановойдун абалы оорлоп, жасалма дем алдыруучу аппаратка туташтырылган.

Василий Лановой 1934-жылы 16-январда Москвада төрөлгөн. Ал театралдык студияга тапшырып, 1948-жылы "Дорогие мои мальчишки" аттуу спектаклде роль аткарган. Актёр "Алые паруса", "Коллеги", "Война и мир", "Анна Каренина" жана башка тасмаларда ролдорду аткарган.

Автор: Айжанар Рыспек кызы