Илон Масктын Путинге Clubhouse'да баарлашуу сунушу боюнча Кремлге түшүндүрмө келген жок

Кремль Орусиянын президенти Владимир Путинди Clubhouse социалдык тармагында баарлашууга чакырган ишкер Илон Масктын сунушунун чоо-жайын тактоого аракет кылды. Бул тууралуу шейшемби күнү журналисттерге мамлекет башчынын басма сөз катчысы Дмитрий Песков билдирди.

Маалыматка ылайык, Кремль сунуштун чоо-жайын билүүгө жетиштиби деген суроого Песков: "Бул кандайдыр бир түшүнбөстүктөр болгон болушу мүмкүн", - деп жооп берди. "Биз чындыгында бул сунуштун чоо-жайын тактоо үчүн суроо бердик, бирок эч кандай жооп ала элекпиз", - деди Кремлдин өкүлү.

Президенттин өкүлү бул чакыруунун Маскка эч кандай тиешеси жок болушу мүмкүн деп божомолдогон. "Кыязы, бул тема эчак эле бүтүп калган", - деп кошумчалады Песков.

Буга чейин миллиардер Илон Маск Орусиянын президенти Владимир Путинди Twitter'деги расмий баракчасына эки тилде кайрылып, аны барган сайын популярдуу болуп жаткан Clubhouse социалдык тармагында маектешүүгө чакырган.

Автор: Айзада Кыдырмышева