Кытай коронавируска каршы вакцинаны 69 өлкөгө бекер берип, 43 өлкөгө сатат

Кытай Эл Республикасы 69 өлкөгө коронавируска каршы вакцинаны бекер берет. Бул тууралуу чет элдик басылмалар жазышууда.

Маалыматка ылайык, 10 миллион даана кытай вакцинасы 69 өлкөгө бекер берилсе, 43 өлкөгө сатылат.

"COVAX демилгесинин алкагында, биз 10 миллион доза вакцинаны өнүгүп келе жаткан өлкөлөргө бекер беребиз деп убада бердик. Кытай кайтарымсыз түрдө 69 өлкөгө вакцина таратат, ал эми 43 өлкөгө экспорттойт. Биз вакциналар боюнча эл аралык кызматташууда ишенимдүү түрдө алдыда келе жатабыз", - деп билдирген өлкөнүн тышкы иштер министри Ван И.

Мындан сырткары ал Кытай бийлиги БУУнун ыктыярчыларына вакцина тартуулагандыгын кошумчалаган.

"Вакцина менен эл аралык Олимпиада комитетин, олимпиада оюндарына катыша турган спортчуларды да камсыз кылууга даярбыз", - деп билдирген министр.

Автор: Бекболот Сарыбаев