Чолпон-Атада көк бөрү боюнча клубдар аралык Дүйнө чемпиондугу башталды

Чолпон-Ата шаарында көк бөрү боюнча дүйнө чемпиондугу старт алды. Бүгүн, 13-августта мелдештин алгачкы оюндары өтүүдө.

Алгачкы беттеш Клубдар лигасынын тайпалык баскычында "Алтай" жана "Екатеринбург" командалары арасында өтүп, "Алтай" клубу атаандаштарын 5:0 эсебинде жеңип алды.

Мындан тышкары бүгүн аталган лигада "Жаштык" жана "Алтын-Альянс" командалары беттешет. Ошондой эле Достук кубогу үчүн "Ынтымак" жана "Сары-Өзөн" командалары тайпалык баскычтагы алгачкы оюнда кез келет.

Дүйнө биринчилигинин расмий ачылышы саат 13:00гө белгиленген.

Белгилей кетсек, көк бөрү боюнча клубдар аралык Дүйнө чемпиондугу 13-августтан 20-августка чейин Чолпон-Ата шаарында өтөт. Ага Кыргызстан, Казакстан, Орусия, Өзбекстан, АКШ жана Ооганстандан келген клубдар катышат. Турнир Достук кубогу, Клубдар аралык дүйнө чемпиондугу жана Ардагерлер кубогу болуп үч форматта өтөт.

Автор: Жанбулат Жумабеков
Фото: Жанбулат Жумабеков