Көк бөрү: "Ынтымак" Сары-Өзөндү" жеңди

"Ынтымак" командасы Көк бөрү боюнча клубдар аралык дүйнө биринчилигиндеги алгачкы беттешинде күчтүү делген "Сары-Өзөндү" жеңип алды.

Тайпалык баскычтагы Достук кубогу үчүн болгон оюн 5:1 эсебинде таластык команданын жеңиши менен аяктады. Беттеште "Ынтымактын" катарынан Нуржан Мелисбек уулу 3 салым таштаса, Өмүрбек Эсен уулу менен Кушчубай Илис уулу бирден улак салышты.

Ал эми "Сары-Өзөндүн" жалгыз салымын команданын капитаны Сейитбек Анарбек уулу жаратты.

Белгилей кетсек, Чолпон-Атада өтүп жаткан Дүйнө чемпиондугунда Кыргызстандын Жогорку лигасында ойногон 4 команда (Ынтымак, Достук, Сары-Өзөн жана Мурас) Казакстандын күчтүү делген 4 командасы менен (Астана, Жетису, Шымкент, Түркстан) Достук кубогу үчүн күч сынашат. Дүйнө биринчилиги 20-августка чейин созулат.

Автор: Жанбулат Жумабеков
Фото: Жанбулат Жумабеков