Көк бөрү: Казакстандык клубдардын беттешинде "Астана" "Жетису" командасын ири эсепте жеңип алды

Чолпон-Атада Көк бөрү боюнча клубдар аралык дүйнө биринчилиги уланууда. Бүгүн, 15-августта Казакстандан келген "Астана" менен "Жетису" клубдары "В" тайпасында кез келишти. Достук кубогу үчүн болгон тайпалык беттеш 8:0 эсебинде астаналыктардын жеңиши менен аяктады.

Эске салсак, Казакстандын күчтүү делген 4 командасы ("Астана", "Жетису", "Шымкент", "Түркстан") Кыргызстандын алдыңкы 4 клубу менен ("Ынтымак", "Достук", "Сары-Өзөн", "Мурас") Достук кубогу үчүн күч сынашат. Буга чейин "А" тайпасындагы алгачкы беттештер орун алган. Анда "Ынтымак" 5:1 эсебинде "Сары-Өзөндү", ал эми "Достук" 7:4 эсебинде "Мурасты" жеңип алган.

Көк бөрү боюнча клубдар аралык дүйнө чемпиондугу 20-августка чейин уланат. Ага дүйнөнүн 6 мамлекетинен келген 22 команда катышууда. Турнирдин башкы максаты көк бөрү спортун эл аралык деңгээлде өнүктүрүү жана мамлекеттер арасындагы ынтымакты бекемдөө болуп саналат.

Автор: Жанбулат Жумабеков
Фото: Көк бөрү федерациясы