Манасчы Сапарбек Касмамбетовго билим жана маданиятка кошкон зор салымы үчүн өкмөттүн Ардак грамотасы тапшырылды

Манасчы, акын Сапарбек Касмамбетовго кыргыз өкмөтүнүн Ардак грамотасы тапшырылды. Белгилүү болгондой, бул сыйлык белгилүү манасчыга билим жана маданиятка кошкон зор салымы үчүн ыйгарылды. Өкмөттүн басма сөз кызматы билдиргендей, токтомго премьер-министр Жоомарт Оторбаев 2014-жылдын 16-октябрында кол койгон.

Сапарбек Касмамбетов 1934-жылы Нарында туулган. Кочкордо окуп, таалим алган. Ал - манасчы, төкмө акын, Эл агартуунун отличниги, Балыкчы шаарынын ардактуу атуулу, Манас-1000 юбилейлик медалынын жана Даңк медалынын ээси. 1987-жылдан бери Кыргызстанда өткөрүлгөн "Манас" айтуу боюнча сынактарда 7 ирет жеңүүчү болгон.

С.Касмамбетовдон “Семетей” эпосунун “Кырк чоронун өлүмү” эпизоду (1600 сап ыр) жазылып алынган. Андан сырткары СССР мезгилинде радио, телевидениелерге миңдеген саптар жаздырылып, азыр алардын фондунда сакталуу.