Ыр-күлкүгө толгон концертте “Беш тапандын" жигиттери ырчылык өнөрүн, "Кеңеш" тобунун солисттери куудулдук талантын элге көрсөтүштү

Ырчы Назира Токонова концертте эки ыр аткарды.

Концертке конок катары келген "Эски достор".

Тамада болууну өздөштүрүп жаткан жигит...

Көп сүйлөбөйүн дегенби, Гүлмира айым концерттин башында бир-эки сөз сүйлөп, концерттин аягына чейин ырдап, Мүзүр мырзага жан шерик болуп турду.

Концертке келгендер адаттагыдай эле ырчыларга гүлдесте сунуп жатышты.

"Кеңеш" тобу буга чейин элдин жүрөгүнөн орун алган ырларды аткаруу менен жаңы ырларды да тартуулап жатышты.

"Кеңеш" тобу "Ханышам" аттуу чыгарманы аткарууда...

Концерттин кичинекей көрүүчүлөрү бийлеп, сүрөткө тартып, ырчыларга гүл берип турушту.

"Балакайлар" кийимдери менен гана көрүүчүлөргө күлкү тартуулабастан, тамашалуу ырларды да аткарышып жатышты.

Куудулдар МАИчи менен таксисттин образында...

Сулейман: "Хүрремим, менин сүйүктүү Гүлмирам, сен менин ханышамсың!"

Албетте, окуя Хүррем султандын кийлигишүүсү менен аяктады.

"Даңазалуу кылым" тамашасында Сулейманга Тажикстандан күң алып келишти...

Мүзүр мырза Сулейман султандын образын заманбап стилде аткарып, хип-хоп бийлеп кирип келе жатат...

"Беш тапандын" жигиттери "Бут кийим тазалаган бала" тамашасы менен...

"Беш тапандын" жигиттери "Сармерден" тамашасы менен...

"Эксклюзив" бий тобу да концертте өз өнөрлөрүн көрсөтүштү.

Куудулдар кафеге келген эки мастын образында. "Палоо, лагман, куурдак, шорпо ашказанга зыян" деп, талкан сунуштаган ашпозчунун монологунан кийин мастар да соолугуп калышты...

"Көрүүчүлөр жылдыздардын талантына гана баа беришсин" деген ойдобу, айтор, сахнанын жасалгасы жөнөкөйлүгү менен айырмаланды.

"Кеңеш" тобу көпчүлүктүн суранычы менен "Балалык" аталышындагы ырды эки ирет аткарышты.

Куудул мырзалар ырчылык өнөрлөрүн элге тартуулап жаткан учур...

Куудулдар менен ырчылар сахнада эки ырды чогуу аткарышты.

"Беш тапан" куудулдар тобу алгач "Ассолому алейкум" аттуу ыр менен концертти ачып беришти.

Куудул жигиттер ар тараптуу талант экенин концертте дагы бир жолу көрсөтүштү.

Адаттагыдай эле куудулдар менен ырчылардын кош концертин бийчилер ачып беришти.

Бишкектеги Спорт Ордосунда 25-октябрда "Кеңеш" тобу менен “Беш тапан” куудулдар тобу биргеликте концерт беришти. Саат 19:00гө белгиленген чыгармачылык кече 50 мүнөт кечигип көшөгөсүн ачты. Көрүүчүлөр залдын 70 пайызын ээледи. Алгач сахнага "Беш тапандын" куудул жигиттери саламдашып ырдап чыгышып, аларга "Кеңеш" тобунун ырчылары кошулду.

“Беш тапандын” жигиттери куйкум тамашалары менен көрүүчүлөргө жагымдуу маанай тартуулашты. Куудулдар коомдогу саясий окуяларды сынга алганы көпчүлүктү жылмайтты. МАИ кызматкери “милдетимди аткаруу үчүн абанын ысык-суугуна карабай күзөттө турсам, эреже бузгандар айыпты төлөбөй качышат” деп көзүнө жаш алса, таксист “эптеп 3 күндө тапкан акчамды алып аласыңарбы...” деп ыйлап кирди. Алар "1500 сом бер", "700 сом бер" деп соодалашып, унаа жолундагы көрүнүштү чагылдырышты.

Ал эми балакайлардын кийимин кийген куудулдар “Мектепте свет жок, каникулга тарадык. Ыраазыбыз өкмөткө, биз эс алып жыргадык” деп жарык көйгөйүн тамашага салып өтүштү. Бут кийим тазалаган бала кыска кийим кийген кыздарды сынга алды.

"Кеңеш" тобу "Сүйүү мүрөгү", "Бир гана сен", "Балалык", "Ак кеме", "Айылым", "Издедим", "Ак жамгыр" аттуу ырларын аткарганда көрүүчүлөрдүн кошулуп ырдап жатканы ырчылар ар бир адамдын жүрөгүнөн орун таба алганын айтып турду. Мүзүр мырза үйдүн башчысы катары сахнада сүйлөп, ырдап, тамашалап жатты. Ал эми Гүлмира айым сүйлөбөсө да сулуулугу, назиктиги менен сахнага көрк кошуп турду.

Ыр-күлкүгө толгон концертте “Беш тапандын" жигиттери "Кеңеш" тобунун репертуарындагы "Сирень гүлү" аттуу ырды аткарышты.

Ырчыларды куттуктап сахналаштары Азиза, Айнура Салахидинова, Роза Шакирова, Назира Токоновалар ыр белек тартуулашты. Концерттин соңунда куудулдардын "Сармерден" аталышындагы тамашасы мыкты номерлердин бири болду. Куудулдар "Даңазалуу кылым" тасмасындагы Ибрагим менен Сүмбүл аганын, Мүзүр мырза Сулейман султандын ролун Осмон доорундагы жана заманбап стилде аткарганы элдин эсинде көпкө сакталары бышык. "Хүрремим, Гүлмирам, сен менин ханышамсың!" деген ырчы жубайы менен "Ханышам" деген чыгарманы ырдады.