Ысык-Көл облусундагы жер титирөөдөн улам жабыркагандарга чогултулган гуманитардык жардамдар өз даректерине жөнөтүлдү

КРнын Өзгөчө кырдаалдар министри Кубатбек Бороновдун атайын тапшырмасын аткаруу максатында Ысык-Көл облусуна гуманитардык жардам берүү үчүн бүгүн, 26-ноябрда саат 10-11 чамасында 7 жүк ташуучу унаа жөнөп кетти.

ӨКМнын басма сөз кызматынан билдиришкендей, жөнөтүлгөн гуманитардык жардамдардын курамында 350 өздүк гигиена кутучасы (бир куту 5 адамга же бир үй-бүлөгө ылайыкташтырылган), 600 даана жылуу жууркан бар. Анын жалпы суммасы 816 634 сомду түзүүдө.

Ошондой эле Ош шаардык мэриясы тарабынан, Ош шаарынын элинин атынан уюштурулган тамак-аш азыктары жана курулуш материалдары да ӨКМнын оор жүк ташуучу унааларына жүктөлүп кетирилди.

Эске салсак, 14-ноябрда күчү 7 баллга жеткен жер титирөөнүн кесепетинен айрым жарандардын турак жайлары зыянга учураган болчу.

Автор: Мальвина Уметбекова
Фото: ӨКМдан алынды