СОҢКУ КАБАР
- Саясат
- Коом жана турмуш
- Саясаттагы соттук иштер
- Маданият, шоу-бизнес
- Кылмыштар, кырсыктар
- СОТТУК ИШТЕР
- Спорт
- Элдик кабар
- Супер-Инфо
- Түркүн дүйнө
- Тест куржун
- “SUPER MEDIA” пресс-борбору
- Сурамжылоо
- Бизнес-Инфо
- Ийгилик сыры
- Эмгек жарчысы
- Көз караш
- Лонгрид
- Президенттик шайлоо - 2021
- Ийгилик жолунда
- Адистен кеңеш
- super.kg орусча
СУПЕР-ИНФО
- Саясат
- Шоу дүйнө
- К-рор дүйнөсү жана корей тасмалары
- Маданият
- Иликтөө
- Турмуш
- Крим-инфо
- Спорт
- Жан дүйнө
- Түркүн дүйнө
- Алтын балалык
- Укуктук кеӊеш
- Илим жана техника
- Ден соолук жана сулуулук
- Психология жана үй-бүлө
- Тиричилик, бизнес
- Ашкана сырлары
- Жылдыз төлгө
- Маалымдама
- Супер-Инфо 20 жашта
- Көз караш
- Эмгек жарчысы
Кыргыздын ыйык тоосу Сулайман тоо, улут дөөлөтү “Манас” үчилтиги, шырдак, ала кийизди улай жай айларында Чүйдөгү байыркы шаар калдыктары Суяб, Баласагын, Невакет ЮНЕСКОнун Дүйнөлүк мурастар тизмесине киргизилди. Жыл соңунда көчмөн элдердин боз үйү Кыргызстан менен Казакстандын биргелешкен аракети менен Дүйнөлүк мурастар тизмесинен орун алды. Добуш берүү учурунда 170тен ашуун мамлекеттин өкүлдөрү боз үйдү кыргыз менен казакка таандык орток мурас деп таанышты. Айтыш, көк бөрү, Өзгөн мунарасы, Таш-Рабат жана Сафед-Булан тарыхый комплекстери да бул тизмеге кирет деген ишеним бар.
Жыл ичинде КРнын Маданият, маалымат жана туризм министрлигинен "Мыкты кызматкер" наамын алгандардын саны арбын болду. Алардын катарында ырчылар Айнура Салахидинова, Аскат Мусабеков, Дайыр Исмадияров, Эрнест Бөрүбаев, Юлия Руцкая, Жумагүл Раимжан кызы, Эльзар Өскөнбаева, "Кызыл өрүк" обондуу ырынын автору Мирлан Алыкулов, ЖКнын депутаты Бөдөш Мамырова, сүрөтчүлөр Майрамкул Асаналиев, Айтбүбү Бадахшанова, комузчу Рахат Көчөрбаев бар. Ал эми актёр Марат Жанталиев «Нарындын ардактуу атуулу» аталып, Асел Турдалиевага «Билим берүүнүн отличниги» наамы тапшырылды. Айтор, бул жылы "Маданияттын мыкты кызматкери" төш белгиси дүңүнөн да, чекенесинен да берилди.
Жылкы жылында шоу-бизнес айдыңындагы белгилүү жүздөр наристе жытын жыттап, кубанычын күйөрмандары менен тең бөлүштү. Актёр, режиссёр Азамат Арыков кыздуу болсо, жазында ырчы айым Азиза экинчи жолу энелик бакыттын даамын татып, Селима аттуу кызын жарыкка алып келди.
Жаз айларында маданият кызматкерлери "кыргыз маданияты өлдү" деп Өкмөт үйүнүн алдына өкүрүп барышкан. "Кайран заман" аталышындагы акция бийлик өкүлдөрүнүн көңүлүн маданиятка буруу максатында уюшулган. Өткөн жыл маданият тармагындагы бир катар көрүнүктүү инсандарды ала кетти. Апрель айында бүтүндөй өмүрүн театрга арнаган кайталангыс талант, КРнын Эл артисти Бакирдин Алиев 81 жаш курагында көз жумду. Акыркы жылдары актёрдун ден соолугу начарлап, эки көзү көрбөй калган эле. Мындан сырткары Ысык-Көлдөн келе жатып жол кырсыгына кабылган ырчы Фархат Кеңешбек уулу каза болду. Андан кийин эле узак оорудан улам комузчу, күүчү, ырчы жана аткаруучу Нурак Абдырахманов 67 жаш курагында дүйнө салды. Залкар талант, куудул жана пародист Жаныбек Алыкулов 20-июль күнү 54 жашында каза тапты. Кыргыз Эл артисти, обончу, аткаруучу Токон Эшбаев 2-августта узак оорудан улам 64 жаш курагында көз жумган. 16-августта Кыргыз Эл артисти, Токтогул атындагы Мамлекеттик сыйлыктын лауреаты, кыргыз профессионалдык бий искусствосунун көрүнүктүү өкүлү Мелис Асылбашев 67 жаш курагында дүйнө салды. Сентябрда Каракол шаарында кыргыздын эң алгачкы актрисасы, белгилүү тилчи жана профессор Кусеин Карасаевдин жубайы, кыргыз стенографиясын биринчи болуп түзгөн Айша Карасаева 103 жаш курагында көз жумду.
2014-жылдын эсебинен көз күйдүргөн бойдоктордун саны бир топ азайды. Анткени "Ээнсиреген үй" тасмасында башкы каармандын образын жараткан актриса Марал Койчукараева ушул эле тасмадагы башкы каармандын ролун аткарган актёр Атай Өмүрбековго турмушка чыкты. Ырчылар Каныкей, Айгерим Расул кызы, Айпери Кубик кызы, Каныкей Акын, актриса жана моделдик кесипти аркалап келишкен Аида Чоткараева жана Айжамал Жакеева, «Президент жана бомж» тасмасында Касиет аттуу мээримдүү кыздын ролун жараткан актриса Жанара Барманова турмушка чыгышты. Ошондой эле ырчы Азиз Жетигенов, актёрлор Бакыт Тынайбеков, Мирлан Абдулаев, режиссёр Руслан Акун, клипмейкер Мирлан Саткымбаев, «Беш тапан» куудулдар тобунун бир тапаны Болсунбек Стакеев, "тамашоучулардан" «Позитифф» командасынын экс-капитаны Актан Рыскелдиев, «Юристтер» командасынын оюнчусу Нургазы Саралаев, Кубат Кубанычбеков, "Жигиттер" командасынын түптөөчүсү Азамат Исмаилов бойдокчулук менен кош айтышты. Күз айларында мындан бир жыл мурун үйлөнгөн «Миң кыял» радиосунун мурунку ди-джейлери Алтын Мырза менен Гүлназ Бакир кызы жана ырчы Мирбек Атабеков сүйүктүүсү Мээрим менен заманбап үйлөнүү тоюн беришти
Өткөн жылы жаш ырчы Аяна Касымова орусиялык «Артист» теледолбооруна катышып, долбоордун финалына чейин жете алды. 16 жаштагы Айыма Айылчиева Украинанын Киев шаарында өткөн "X-Factor 5" сынагына катышып, биринчи турдан ийгиликтүү өттү. Бирок долбоор узакка созулгандыктан, ырчы сынактын аягына чейин катышуудан баш тарткан. Шайыр жаштардан түзүлгөн “KG club” тобунун өкүлү Акимжан Карасаев Орусиянын ТНТ телеканалындагы “Comedy Баттл” юмордук долбооруна катышып, финалга чейин жетти. Ал эми эл аралык сынактарга катышуудан тажабаган Курал Чокоев Чехиянын борбору Прагада болуп өткөн эл аралык «Diamond Voice» ырлар сынагында артистизм, көрүүчүлөрдүн баасына арзыганы үчүн атайын сыйлыктарды, ал эми вокал сынагынан 3-орунду алды. Ошондой эле май айында Уфа шаарында өткөн «Урал моңо-2014» эл аралык музыкалык сынагында Курал Чокоев 1-орунду алса, Айбек Саралаев 2-орунду багындырды. Декабрь айында белгилүү бийчи Атай Өмүрзаков өзүнүн окуучуларынан турган “Тумар КР” бий тобу менен бирге Германияда өткөн “Das Supertalent-2014” телесынагынын финалына катышып, 4-орунду ээледи. Сынактын тандоо турунан эле дароо финалга өткөн топ финалда Кыргызстандын намысын коргоду. Ошондой эле Америка Кошмо Штаттарында орун алган бий боюнча дүйнөлүк биринчиликте кыргызстандык “We’ll be” бий тобу катышып, таланттарын тартуулап кайтышты. 
Кыргыз кинемотографиясы үчүн өткөн жыл жемиштүү болду өңдөнөт. Камерасы бар адамдардын баары эле кино тартууга кириштиби, айтор, 2014-жылы көрүүчүлөрдүн сынына ай сайын жаңы кинолор коюлуп жатты. Алардын катарында тартууга кеткен каражаты да, кинотеатрда көрсөтүүдөн түшкөн кирешеси көп да тасмалар болду. Коомдук-саясий окуялардан улам элдин көңүлүн башка нукка буруу башкы максат болгонбу, жыл ичинде комедия жанрындагы тасмалар басымдуулук кылды. Комедия жанрында режиссёр Эрнест Абдыжапаров “Беш миң сом”, Айбек Өмүров "20дагы чал-кемпир", Нурлан Мамакеев "Султан Сулайман", "Браво", "Пентхаус", "Оштуктун 11 досу", Сапар Сайназаров “1+1=3”, Максат Жумаев “Гонщик таксист”, Руслан Акун "Герой моей девушки", Эрнест Уметалиев “Классташтар KG”, Мирлан Абдулаев “Балакай”, Камчыбек Жумабеков жана Тилек Чериков “Иттей сулуу”, Аскат Табалдиев "Бир тууганчик" тасмаларын тартуулашты. Мындан сырткары мелодрама жанрында Сүйүн Откеев “Миллиондук мелдеш-2” тасмасына режиссёрлук кылса, ырчы Асема Токтобекова "Көк жал" аттуу криминалдык драмасын тартты. Кыргызстандын тарыхындагы алгачкы эң кымбат тасма аталган Садык Шер-Нияздын "Курманжан датка" фильми Монреаль жана Орусияда өткөрүлгөн кинофестивалдарда көрсөтүлүп, жогорку баага татыды. Ошондой эле "Оскарга" сунушталып, чет элдик кинофестивалдардын ачылыш аземинде көрсөтүлдү. Тасма SUPER.KG порталындагы жылдын мыктыларын аныктаган сурамжылоодо "Жылдын супер тасмасы" наамына татыктуу болду. 
