Зомбулуктун алдын алууда Кыргызстанда жакыр жашаган үй-бүлөлөрдүн балдарынын маалымат базасы түзүлөт

Кыргызстанда жакыр жашаган үй-бүлөлөрдүн балдарынын маалымат базасы түзүлөт. Бул тууралуу бүгүн, 27-январда балдарга карата зордук-зомбулуктун алдын алуу маселесине арналган жыйында премьер-министр Жоомарт Оторбаев билдирди.

Анын айтымында, ар бир мектепте жакыр үй-бүлөлөрдүн балдарынын толук тизмеси болуш керек. "Мындан тышкары мигранттардын балдарынын базасы түзүлөт. Бардык маалыматты чогултуу кыйын, бирок колубуздан келет. Ал эми жергиликтүү бийлик өкүлдөрү ата-энелерге түшүндүрүү иштерин жүргүзүшү зарыл. Социалдык өнүгүү министрлиги "111" ишеним номерин ишке ашырууну пландап жатат. Бул номер аркылуу ар бир жаран зордук-зомбулук фактысы боюнча кайрыла алат. Өлкөдө балдарды коргоо борборлорун да ачууну пландап жатабыз",- деди премьер-министр.

Автор: Нургазы Аматов
Фото: Нургазы Аматов