Бишкек шаардык соту депутат Аида Салянованын жолдошу Бакыт Абдыкапаровду шарттуу түрдө 7 жылга эркинен ажыратты

Бүгүн, 20-апрелде Бишкек шаардык соту Жогорку Кеңештин депутаты Аида Салянованын жолдошу Бакыт Абдыкапаровдун иши боюнча соттук ишти карап, чечим чыгарды. Бул тууралуу SUPER.KG порталына Бишкек шаардык сотунун басма сөз кызматынын жетекчиси Гүлмира Уметалиева билдирди.

Маалыматка ылайык, шаардык сот "алдамчылык" жана "кызмат абалынан кыянаттык менен пайдалануу" беренелери менен айыпталып жаткан Бакыт Абдыкапаровду шарттуу түрдө 7 жылга эркинен ажыратуу боюнча өкүм чыгарып, 50 эсептик көрсөткүчтөгү айып пул салынды. 7 жылдын 3 жылы сыноо мөөнөтү болуп эсептелинет, эгер соттолуучу аталган сыноо мөөнөтүнүн ичинде өзүн туура алып жүрсө, жаза мөөнөтү кыскартылышы мүмкүн.

“Бүгүн судья Жаңыл Мамбеталынын кароосунда соттук отурум болуп өттү. Менин колума өкүм тие элек, ошол себепке байланыштуу эч нерсе айта албайм”,- деди Уметалиева.

Айта кетсек, Бакыт Абдыкапаров "алдоо жолу менен 50 миң доллар алган жана Бишкек шаардык жылуулук борборуна сапатсыз көмүр алып келген" деп айыпталып жаткан. Мындан улам УКМКнын Тергөө башкармалыгы КРнын Кылмыш-жаза кодексинин "кызмат абалынан кыянаттык менен пайдалануу", "алдамчылык" беренелери боюнча кылмыш ишин козгоп, Биринчи Май райондук сотунун чечими менен Абдыкапаров 7 жылга шарттуу түрдө кесилген.

Автор: Алина Токтакунова