"Ак илбирс" Улуттук киносыйлыгында "Сүтак" тасмасы бардык номинациялар боюнча сыйлыктарды илип кетти (тизме)

Бүгүн, 13-майда “Манас” кинотеатрында V “Ак илбирс” Улуттук киносыйлыгын тапшыруу аземи болуп өттү.

Аземдин башталышында 2015-жылдын алгачкы тасмасы “Бир тууганчик” "Көрүүчүлөрдүн сүймөнчүлүгүнө ээ болгон тасма" номинациясы менен сыйланды. Тасманын режиссёру Данияр Болотбеков: “Биз кинону тартып баштаганда мындай ийгиликтерге жетебиз деп ойлогон эмеспиз, болгону көрөрмандарды кубанталы деп максат койгон элек”, - деп билдирди.

"Ак илбирс" сыйлыгын бардык номинациялар боюнча "Сүтак" тасмасы илип кетти.

Эң мыкты монтаж – “Сүтак” тасмасы, Элдияр Мадаким

Мыкты көркөм сүрөтчү – “Сүтак” тасмасы, Адис Сейталиев

Мыкты үн режиссёру – “Сүтак” тасмасы, Мурат Ажиев

Мыкты композитор – “Сүтак” тасмасы, Мурзали Жээнбаев

Эркектин мыкты ролу – “Сүтак” тасмасы, Табылды Актанов

Аялдын мыкты ролу - “Сүтак” тасмасы, Анара Назаркулова

Мыкты оператор - “Сүтак” тасмасы, Талант Акылбеков

Мыкты сценарий - “Сүтак” тасмасы, Актан Арым Кубат, Эрнест Абдыжапаров

Мыкты режиссёр - “Сүтак” тасмасы, Мирлан Абыкалыков

Мыкты тасма – “Сүтак” тасмасы, режиссёру Мирлан Абдыкалыков, продюсери Садык Шер-Нияз

Мыкты даректүү тасма – “Дети чистоты”, режиссёру Гузель Дүйшөнкулова

Мыкты кыска метраждуу тасма – “Кольцо”, Бакай Үсөналиев

Борбор Азиядагы мыкты тасма – “Дом для русалок”, режиссёру Елкун Тойчиев, Өзбекстан

Кыргыз кинематографиясына кошкон зор салымы үчүн белгилүү кинооператор, кинорежиссёр Нуртай Борбиев, ошондой эле атактуу актриса Наталья Аринбасарова сыйланышты. Залдагылар залкарларды сыйлоо учурунда ордуларынан туруп, дүркүрөтө кол чабышты.

Актриса Наталья Аринбасарова: "Кыргыз жерин, кыргыз элин жакшы көрөм. Бул жер менен чыгармачылыктагы кызыктуу, көңүлдүү, татаал күндөрүм байланышкан. Тасмага тартылып бүтүп, кетип жатканда бир бөлүгүмдү таштап кетип жаткандай болчумун, ыйлачумун. Сиздерди кайра көрүп жатканыма абдан кубанычтамын, сыймыктанам. Кыргыз жеринде шедеврлер жаратылган. Дагы да жаралат. Чыгармачылык ийгиликтерди каалайм. Баары үчүн рахмат! Бүгүн кечке сиздердин араңыздарда жүрүп, мени жакшы көргөн адамдар көп экенин сезип, бактылуу болуп жүрдүм", - деди өз сөзүндө.

Ошондой эле "Сүтак" тасмасында "Эркектин мыкты ролу" сыйлыгын жеңип алган актёр Табылды Актанов: “Мен киного кеч келдим, бирок сыйлыкты эрте алып жатам. Баарыңыздарга ыраазычылык”, - деп кубанычы менен бөлүштү.