Кадамжай. Кооптуу аймакта жашаган жашоочулар көчүрүлүүдө. Жоголгон 3 жашар бала табыла элек

Баткен облусунун Кадамжай районундагы сел кырсыгынын кесепеттерин жоюу иштери уланып, 3 жашар бала изделүүдө. Бул тууралуу бүгүн, 1-июнда Кыргыз Республикасынын Өзгөчө кырдаалдар министрлигинин басма сөз кызматынан билдиришти.

Маалыматка ылайык, 27-28-май күндөрү нөшөрлөп жааган жаандын кесепетинен Кадамжай районундагы бир катар айылдарда сел жүрүп, турак үйлөрдү, короо-сарайларды, ички жолдорду, ошондой эле көпүрөлөрдү зыянга учураткан.

"Сел кесепеттери жоюлуп, таза суу, жол каттамдары калыбына келтирилип, электр чубалгылары кайрадан тартылууда. Кооптуу аймактардагы жашоочулар көчүрүлүп жатат. Өзгөчө кырдаалдар министрлигинин куткаруучулар тобу 3 жашар баланы издөө иштерин улантууда", - деп айтылат маалыматта.

Мындан сырткары Ош-Айдаркен унаа жолундагы кооптуу аймактарында райондук Жарандык коргонуу кызматынын 15 кызматкери жол каттамын көзөмөлдөөдө.

Автор: Акназар Сулайманкулов