Сузак районунун Кыр-Жол, Ачы айылдарында турак үйлөргө жер көчкү түшүү коркунучу жаралууда

Сузак районунун Кыр-Жол, Ачы айылдарында турак үйлөргө жер көчкү түшүү коркунучу жаралууда. Бул тууралуу бүгүн, 3-февралда Өзгөчө кырдаалдар министрлигинин басма сөз кызматынан билдиришти.

"Жер көчкү түшүү коркунучу жаралган айылдын тургундарына түшүндүрүү иштери жүргүзүлдү. Кыр-Жол айылында 12 турак үйгө, ал эми Ачы айылында 7 турак үйгө жер көчкү түшүү коркунучу бар экендиги аныкталды. Ырыс айыл аймагынын жетекчилигине турак үйлөрдүн жашоочуларын коопсуз жерге көчүрүп чыгаруу боюнча эскертме берилди", - деп айтылат маалыматта.

Мындан сырткары Жалал-Абад-Балыкчы унаа жолунун 50-чакырымындагы Көк-Арт дарыясына жакын жерде жарака пайда болгон. Мындан улам жолдогу коопсуздукту, адамдардын өмүрүн сактоо максатында райондук жол тейлөө ишканасына жана Курманбек айыл аймагына эскертүү берилген.

Автор: Акназар Сулайманкулов