Дзюдочулар Бектур Рысмамбетов жана Юрий Краковецкий эл аралык “Antalya Grand Prix-2017” мелдешинде күмүш медаль тагынышты

7-апрелден 9-апрель аралыгында Түркияда “Antalya Grand Prix-2017” эл аралык мелдеши өтүп, анда 11 кыргыз спортчусу катышты. Мелдештин расмий сайтындагы маалыматка ылайык, анда Бектур Рысмамбетов менен Юрий Краковецкий өз салмак категориясында финалга чейин жетишкен.

Белгилүү болгондой, 66 килограмм салмак ченинде Бектур Рысмамбетов түрк, монгол спортчуларын жеңген. Жарым финалдык беттеште “Рио-2013” Дүйнө чемпиондугунун күмүш медалынын ээси, казак спортчусу Азамат Мукановду утуп алган. Финалдык беттеште мекендешибиз орус спортчусу Абдул Абдулжалиловго жеңилип, 2-орунду камсыздады.

100 килограммдан жогору салмакта Юрий Краковецкий орус, түрк жана азербайжандык атаандаштарын жеңип, финалга карай бет алган. Анда “Рио-2016” Олимпиадасынын жеңүүчүсү чехиялык Лукаш Крпалек менен кез келип, жеңилүүгө дуушар болду. Жыйынтыгында күмүш медалга арзыды.