Мамлекеттик айыптоочу: "Садыр Жапаров облус башчысын барымтага алууга катышкан жана ошол окуядан кийин өлкөдөн чыгып кеткен"

Бүгүн, 30-июнь күнү Бишкек шаарынын Биринчи Май райондук сотунда мурдагы депутат Садыр Жапаровдун соту өтүүдө. Соттук отурумдун жүрүшүндө мамлекеттик айыптоочу Садыр Жапаров облус башчысын барымтага алууга катышканын жана ошол окуядан кийин өлкөдөн чыгып кеткенин айтты.

"Жапаров Ысык-Көлдө митинг өткөрүүгө камынып, Саруу айылында айылдын лидерлери менен жолуккан. Митингге көк бөрү ойногон балдарды тартууга аракет кылган. Жапаров облус жетекчиси Эмилбек Каптагаевди барымтага алууга катышкан. Бул аракеттерди Жапаров уюштурган атчан адамдар ишке ашырышкан. Кумтөр маселеси жана андагы насыялар боюнча маселелерди чечип берүүнү талап кылышкан. Талаптар аткарылбаса Каптагаевди өрттөп өлтүрөбүз деп коркутушкан. Облустук администрацияга кирүүгө аракет кылган митингчилерди милиция кызматкерлери курчоого алганда алар туш тарапка качышкан. Жапаров ушул окуядан кийин үй-бүлөлүк шартка байланыштуу деп өлкөдөн чыгып кеткен", - деди мамлекеттик айыптоочу.

Ал эми судья Жапаровго "жогорудагы айыптоолорду моюнуңузга аласызбы?" деди. Ага Жапаров "жалган жалаа, саясий буйрук" деп жооп берди.

Эскерте кетсек, 2017-жылдын 25-мартында Садыр Жапаров Казакстандан Кыргыз мамлекетине киргенде аны чек арадан УКМКнын кызматкерлери кармап кеткен. Ал "бейбаштык", "бийлик өкүлүнө карата зордук-зомбулук көрсөтүү", "барымтага алуу" жана башка беренелер боюнча айыпталууда. 26-мартта Садыр Жапаров Биринчи Май райондук сотунун чечими менен тергөө бүткүчө Бишкектеги №1-тергөө абагына камалган. 6-апрелде Бишкек шаардык соту райондук соттун чечимин күчүндө калтырган. Ал эми 24-апрелде Бишкектин Биринчи Май райондук соту Жапаровду камакта кармоо мөөнөтүн 28-майга чейин узарткан. Бул чечимди Бишкек шаардык соту күчүндө калтырган болчу.

Автор: Акназар Сулайманкулов