НТС телеканалынын юристи: "Райондор аралык соттун аныктамасы боюнча шаардык сотко кайрылабыз"

Бишкек шаарынын райондор аралык соттун аныктамасы боюнча шаардык сотко кайрылабыз. Бул тууралуу бүгүн, 20-декабрда SUPER.KG порталына НТС телеканалынын юристи Амантур Абдырахманов билдирди.

"Бишкек шаарынын райондор аралык соту эмне себептен мындай аныктама чыгарганы белгисиз. Ал аныктамада НТС каналы үчүнчү жак катары көрсөтүлгөн. Ал эми жоопкер делген "Аянт" ЖЧКсы менен биздин эч кандай карым катышыбыз жок. Биз учурда тиешелүү документтерди даярдап, ал аныктама боюнча Бишкек шаардык сотуна кайрылганы жатабыз", - деди юрист.

Айта кетсек, 19-декабрь күнү саат 17:00 чамасында сот аткаруучулар НТС телеканалынын имаратына милиция кызматкерлеринин коштоосунда кирип барышкан. Сот аткаруучулар каналдын мүлктөрүн камакка алуу боюнча Бишкек шаарынын райондор аралык сотунун чечимин көрсөтүшкөн.

Кыргыз Республикасынын Сот департаментинин маалыматына караганда, НТС телеканалынын мүлктөрүн камакка алуу боюнча аныктаманы Бишкек шаарынын райондор аралык соту 2017-жылдын 19-декабрында чыгарган. НТС телеканалынын жетекчилиги менен келишилген сүйлөшүүгө ылайык, соттун аныктамасын аткаруу 20-декабрга жылдырылган болчу. Азыркы тапта сот аткаруучулар каналдын мүлктөрүн каттап жатышат.

Айта кетсек, НТС телеканалы депутат Өмүрбек Бабановго таандык делет. Ушул жылдын 4-ноябрь күнү Жогорку Кеңештеги "Республика-Ата Журт" фракциясынын лидери Өмүрбек Бабановго карата "улуттар аралык кастыкты козутуу" жана "Конституциялык түзүлүштү күчкө салып өзгөртүүгө эл алдында чакырык жасоо" беренелеринин негизинде кылмыш иши козголгон. Тергөө иштерин жүргүзүү УКМКга жүктөлгөн.

2017-жылдын октябрь айындагы президенттик шайлоодон кийин Өмүрбек Бабанов өлкөдөн чыгып кеткен боюнча кайтып келе элек. Айрым маалыматтарга караганда, анын Орусияда дарыланып жатканы айтылат.

Автор: Жамалидин Парманкулов
Фото: Жамалидин Парманкулов