Дайынсыз болуп Түркиядан табылган ысык-көлдүк 2 баланын энеси Кыргыз жергесине келип кайра дайынсыз болуп жатканын айтат апасы

Дайынсыз болуп Түркиядан табылган ысык-көлдүк 2 баланын энеси Кыргыз жергесине келип кайра дайынсыз болуп жатат. Бул тууралуу SUPER.KG порталына анын апасы Бегайым Осмонбекова билдирди.

"Кызым 9-апрелге караган түнү таңкы саат 04:10до Түркиядан Кыргыз жергесине учуп келген. Өзүм барып тосуп алып Каракол шаарына алып келгем. Бирок кечинде кайра дайынсыз жоголуп кетти. Учурда каякта, эмне кылып жүргөнү белгисиз. Кызымдын билетин да өзүм сатып алдым. Себеби аны чакырган Азербайжан жараны суранган болчу. Ал "апрель айында Түркиянын жарандыгын алам, билет сатып алганга акчам жок мага маселе жаратпасаңар эле кызыңарды салып жиберем" деген. Ага да макул болуп билетти өзүм сатып алдым. Кызым келгенде мага эч нерсе айткан жок. Эми кайра дайынсыз болуп үйдөн качып кеткенде эмне кыларымды да билбей калдым. Кызымды чакырган Азербайжан жараны Түркиянын Анкара шаарында баштык чыгарган заводдо иштейт экен. Биз ал адам тууралуу консулдукка кайрылабыз дегенде кызымды жиберген болчу. Кызым балдарын да эске албай кантип ушундай жоруктарды жасап жатат деп нес болуп турам", - дейт Бегайым.

Эске салсак, 31-мартта Ысык-Көл облусунун Каракол шаарынын тургуну Жаркын Самакова жакындарына айтпай Түркия мамлекетине учуп кеткен боюнча байланышка чыккан эмес. Кызынын дайынын билбей жаткан эне көргөн-билгендерден жардам сурап кайрылып, кызы Жаркын Самакова 2017-жылдын сентябрь айынан бери азербайжан улутундагы жаран менен социалдык тармак аркылуу сүйлөшүп жүргөнүн айткан. Кийин Жаркын Самакованын Түркиянын Анкара шаарынан табылганын апасы кабарлаган болчу.

Автор: Айсалкын Качкынбекова