Мэрлерге чапан, калпак кийгизүү жөрөлгөсү токтоду. Белекке калем сап алган Азиз Суракматов

Бишкек шаардык кеңеште жаңы келген мэрге ушуну менен салтка айланган чапан, калпак кийгизүү жөрөлгөсүнө чекит коюлгандай. Себеби бүгүн, 8-августта Бишкек мэри болуп шайланган Азиз Суракматовго шаардык кеңештин төрагасы Алмаз Кененбаев калем сап белек кылды.

Буга чейин жергиликтүү кеңештерди түз шайлоо боюнча талкууланган жыйында жарандык активист Мавлян Аскарбеков шаардык кеңештин депутаттарына, Алмаз Кененбаевге карата ачуу сындарды айткан.

"Маселе мэрлерде эмес, маселе ошол паракор менен ууруларга калпак кийгизип, чапан жапкан депутаттарда. Алмаз Муканович (ред. Бишкек шаардык кеңешинин төрагасы Алмаз Кененбаев), же андай эмеспи? Мына сиз Түлеев менен иштешип, Өмүркулов, Кулматов, Ибраимовго калпак кийгизбедиңиз беле? Маселе мына ушунда", - деген Аскарбеков.

Ошол эле жыйында Кененбаев мындан ары жаңы мэрлерге чапан, калпак кийгизүү токтотуларын билдирген.

Айта кетсек, бүгүн, 8-августта Бишкек шаарынын мэрлигине жалгыз талапкер Азиз Суракматов шаардык кеңештин 43 депутатынын колдоосу менен Бишкек шаарынын мэри болуп шайланды. Шаардык кеңештеги 45 депутаттын ичинен жалгыз депутат каршы добуш берди, 1 депутат отурумга катышкан жок.

Автор: Бекболсун Молдояр уулу