Кыргыз балбаны Айсулуу Тыныбекова Жайкы Азия оюндарында кыз-келиндер арасындагы мелдештин финалында жеңилүү ызасын тартып, күмүш медаль тагынды.
Бүгүн, 20-августта Индонезияда өтүп жаткан Жайкы Азия оюндарынын кыз-келиндер арасындагы күрөш боюнча мелдеште Кыргыз балбаны Айсулуу Тыныбекова 62 килограммга чейинки салмак ченинде күрөшүп финалга чыккан. Анда Тыныбекова 2017-жылдын Дүйнө чемпиону монголиялык Оркхон Пуревдорж менен кез келди. Беттештин 1-бөлүгүндө монголиялык балбан 3:0 эсеби менен алдыга чыккан. 2-бөлүктө Пуревдорж дагы 8 упай алып, жалпы 11:0 эсеби менен жеңишти илип кетти.
Муну менен Айсулуу Тыныбекова Жайкы Азия оюндарынын күмүш медалынын ээси болду
Бул салмак ченинде коло медалдарды япониялык Каваи Рисако жана түндүк кореялык Жонг Сим Рим тагынды.
Буга чейин Айсулуу Тыныбекова жарым чейрек финалда түндүк кореялык Жонг Сим Римди, чейрек финалда кытайлык Руи Хюну жана жарым финалда индиялык Сакши Маликти утуп алган.
Муну менен Кыргыз капчыгында 2 медаль болду. Мелдештин алгачкы күнү эркин күрөш боюнча мелдеште Кыргыз балбаны Магомед Мусаев күмүш медаль тагынганга үлгүргөн.