Элдин назарын буруп келген ырчылардын кийингени дайыма кызыгууну жаратат. Социалдык тармактан алардын улам жаңы кийимди кийип, ал тургай жарнамалап жүргөндөрүнө дагы күбө болуп келебиз. "Ырчылар анчалык көп кийимдин баарын кийгенге үлгүрөбү? Бир кийимди канча жолу киет? Кийилбеген кийимдерин эмне кылат?" деген окурмандардын суроосуна жооп издеп көрдүк.
Чолпон Талипбек, ырчы: "Кийимдеримдин көбүн эгиз сиңдилериме берем"
"Жаңы кийим алганда эле эгиз сиңдилерим Мадина менен Медина "муну мен кием" деп алдын ала эле "брондоп" коёт. Бир-эки жолу кийгенден кийин сиңдилериме берем. Андан көп жолу деле кие албайбыз. Анткени окурмандар "башка кийимиң жокпу" деп дароо сынга алып баштайт. Ошондуктан гардеробдогу кийимдерди бат-баттан жаңыртып турам. Ал эми атайын тигилген кече көйнөктөрүн кайрымдуулук үчүн сатам. Тактап айтканда, көйнөктөрдү сатып, топтолгон каражаттарды жардамга муктаж адамдарга берем. Аксессуарларымды, бут кийимдеримди сиңдилерим тандап алышат. Калганын жеңелериме, эжелериме берем. Айрым учурда чогултуп, айылдагы туугандарыбызга салып жиберем".
Дайыр Исмадияров, ырчы: "Жаңы кийим алсам, өкүл балдарым "эртерээк батпай калсын" деп "бата" беришет"
"Чыгармачыл адам болгондон кийин кийимдерим көчөгө жана сахнага кийчү деп экиге бөлүнөт. Көчө кийимдеримди бир сезон кием, кээде андан деле көп кием. Өзүмө жаккан футболкам бар. Эсептесем 2006-жылдан бери кийип жүрүптүрмүн. Инстаграмда байлар же кийими көптөр отурабы, бир кийимди 2-3 ирет кийгенимди көрүп калса "чеччи алдыгы кийимиңди, башка кийимиң жокпу" деп башташат. Салмак кошкондон кийин гардеробум жаңырат. Батпай калган кийимдеримди туугандарым тандап алып кетишет. Ал эми сахнага кийчү костюм-шымдарды, көйнөктөрдү тамада болуп жүргөн 3 өкүл балам алышат. Мен жаңы костюм же көйнөк алсам өкүл балдарым "эртерээк батпай калсын" деп тамашалап калышат".
Айдана Дека, ырчы: "Кийимдеримди жардамга муктаждарга берип турам"
"Буга чейин кийимдеримди сиңдилериме берчүмүн. Азыр алар бой жетип, менден дагы чоң болуп кетишти. Мындан улам кийимдеримди кайрымдуулукка берип турам. Социалдык тармактан "кийилбеген кийимдер болсо муктаждарга алып барып берет элек" деген каттар келет. Бир-эки жолу кийилген кийимдеримди чогултуп берип турам. Негизи кандай кийим алсам дагы бир-эки ирет кием. Андан ашык кийсең сынга кабылып баштайсың. Бирок аябай жакшы көргөн кийимдеримди айлап, жылдап деле кийип жүрө берем".
Нурзат Токтосунова, алып баруучу: "Кийимдеримди белекке, ижарага да берем, айрымдарын сатам"
"Кийимдерди бир же эки жолу кием деп айтпайм. Көп эле жолу кием. Ар кандай иш-чараларга кийген формаларымды белекке, ижарага берем, кээде сатам. Ал эми күнүмдүк кийилчү кийимдеримди "NUR" академиясынын окуучуларына, сиңдилериме эле берем. Сумка, аксессуар, бут кийимдеримди таратпайм".
Нурлан Насип, ырчы: "Кийимдерим шкафка батпай баратканда жакындарыма берип турам"
"Мурдагыга караганда азыр кийим дүкөндөрү менен көп иштешип калдым. Ошондон уламбы кийимдерим батпай кетет. Гардеробум толуп калганда бир тууганыма, жакын инилериме берип турам. Кийимди бир же эки жолу кийип таштап салбайм, тажаганча кием десем болот".
Айгерим Расул кызы, ырчы: "Кече көйнөктөрүн сурагандарга ыңгайлуу баада берем"
"Кийимдерди көп жолу кийдим деп ылгабайм. Кайсы кийим ыңгайлуу болсо ошону айлап, жылдап деле кийип жүрө берем. Гардеробумдагы кийимдердин арасында жаңы, бир дагы жолу кийилбеген кийимдерим бар. Кийилбей калган кийимдерди сиңдилериме, жакындарыма берем. Кээде тааныш эмес күйөрмандарым сурашат, аларга дагы берип турам. Ал эми кече көйнөктөрүмдү сурагандар көп. Аларга көйнөктөрүмдү ыңгайлуу баада берем. Аксессуар, бут кийимдерди дагы белекке берем. Көбүнчөсүн бир тууган сиңдим Аяна алып коёт. Күйөрмандарым ырымдап бер деп суранышат. Негизи жеке гардероб боюнча жакшы пландарым бар, буюрса, аны ишке ашырганда күбө болосуздар деп ойлойм".
Ал эми орусиялык белгилүү ырчы Филипп Киркоров жакында эле гардеробун көрсөткөн. Тагыраагы, ал "Осторожно, Собчак!" берүүсүндө шаардын четиндеги үйүн көрсөтүп, гардеробу менен тааныштырган. Долбоордун алып баруучусу Ксения Собчак Киркоровдун гардеробун көргөнгө чейин өзүн "шопоголик" сезерин айтып, "эми өзүмдү бечара сезип калдым" деген. Филипп Киркоровдун гардеробу кызуу талкууга алынып, айрымдары "Кытай базары" дешсе, айрымдары Ксения Собчакты базарда жүрөт деген ойдо болгонун билдиришкен.
