Өлкөдө банктык карталардын саны өсүүдө

Бүгүн, 3-июнда парламенттин Бюджет жана финансы боюнча комитетинин отурумунда Улуттук банктын 2018-жылдын иши жөнүндө отчёту угулууда.

Улуттук банктын төрагасы Толкунбек Абдыгулов өткөн жылы аткарылган иштер тууралуу жалпы маалымат берди.

"Учурда өлкө аймагында 25 коммерциялык банк бар, анын ичинде бүгүнкү мыйзамдарга ылайык 2-3 банк өз милдеттерин аткара албай жатат. Былтыр насыяларга 12 миллиард сом сунушталган. Чыгарылган банктык карталардын саны 20 пайызга өсүп, 2,4 миллиондон ашкан.

2019-жылдын 1-январына карата өлкө аймагында орнотулган банкомат 1,6 миң бирдик, пост-терминалдардын саны 10 миң бирдикти түзгөн", - деди Абдыгулов.

Депутат Зиядин Жамалдинов "Отчётто "ижаралар үчүн төлөмдөр" деп турат, ал ижараларга кеткен эмне төлөмдөр?" деп суроо узатты.

Буга Толкунбек Абдыгулов “Улуттук банкта мындай чыгымдар жок. Бул төлөмдөр "Росинбанкка" кеткен чыгымдар” деп жооп берди.

Ошондой эле эл өкүлү насыялар улуттук валютада берилсин деген жобо бар экендигин жана бул нерсе ишке ашып жатабы деп суроо узатты.

Буга Улуттук банктын төрагасы: "Ооба, доллар менен насыя берүүгө тыюу салынган. Бүгүнкү күндө насыялар улуттук валютада берилип, доллар менен насыя берүү кыйла азайтылган", - деди.

Автор: Мальвина Уметбекова
Фото: Мальвина Уметбекова