Москвада аял 2 баласы менен 9-кабаттан кулап, каза тапты

Бүгүн, 11-ноябрь күнү Москванын түндүк-чыгышындагы Бабушкин районунда аял эки баласы менен 9-кабаттан кулап, балдардын бири аман калып, бири аял менен кошо каза тапты. Бул тууралуу чет элдик басылмалар жазып чыгышты.

Маалыматка ылайык, каза тапкан аял 36 жаштагы Людмила Соколова болгон. Ал кырсык болорго чейин кызы тамак жебей, алсыз болуп жатканын айтып, "Тез жардамга" кайрылган. Аял менен кошо кулаган 9 айлык кызы кырсык болгон жерден каза тапкан, ал эми баласы аман калганы менен абалы оор. Полиция кызматкерлери аялдын үйүн тинтүү учурунда маркумдун "Виталикти (ред. жолдошу) камакка албагыла" деген акыркы катын жана өлүмдөн кийинки жашоо тууралуу жазган ырларын табышкан.

Күбөнүн айтымында, алгач 9 кабаттуу үйдүн астында жаткан кичинекей баланы көргөн, анын артынан улуусу кулаган. "Балдарды көрүп башымды көтөрсөм, 9-кабаттан аял кулап келе жатыптыр", - деген ал.

Маркумдун жолдошу алар кулаганда жумушта болуп, кырсык катталганда келген. Кырсык боюнча тергөө комитети өлтүрүү фактысы боюнча иш козгогон.

Автор: Гүлжамал Абылкасымова