Улуу Британияда энелеш бир тууган ага-карындаш 6 балалуу болушкан. 2 баласын өлтүргөндүгү үчүн алар 35 жылга камакка алынышты

Чет элдик маалымат булактары көп балалуу ата-эненин өз балдарын өлтүрүшкөнүн жана аларга карата соттун чечимин жазышууда. Ага ылайык, Улуу Британияда энелеш бир туугандар Сара Баррас менен Брэндон Мэчин жубайлар катары жашап, 6 балалуу болушкан. Сара Баррас 35 жашта, Брэндон Мэчин 39 жашта. Алар жакыр үй-бүлөдөн болгондуктан балдар үйүндө чоңоюшкан, ал жактан чыккандан кийин жыныстык катнашка барып, чогуу жашап калышкан.

Алардын үй-бүлөсү жөнүндө социалдык кызматкерлер билип, абалын текшергенден кийин балдарды балдар үйүнө алып кетиши мүмкүн болгон. Бирок бир туугандар балдарын ал жакка бербөө үчүн 13 жана 14 жаштагы 2 баласын тумчуктуруп өлтүрүшкөн. Окуя ушул жылдын май айында болгон.

Соттук териштирүү иштеринде алар калган дагы 4 баласын өлтүрүүнү пландап жүрүшкөнү маалым болгон. Алар балдарга баңгизатын берип, андан кийин тумчуктуруп өлтүрмөкчү болушкан.

Сот балдардын ата-энесин "адам өлтүрүү" жана "адам өлтүрүүгө аракет жасоо" жана башка бир катар беренелер менен күнөөлүү деп таап 35 жылдан камакка алуу чечимин чыгарган.

Соттук отурумда балдардын энеси: "Мен аларга өмүр бергем, аны алып да коё алам" деп айткан. Сарра Барастын социалдык тармактагы баракчасында адам өлтүрүү тууралуу билдирүүлөр бар сүрөттөр жүктөлгөндүгү жазылат маалыматта.

Балдардын бири ата-энелерин сот 300 жылга камашын каалай турганын айткан.