АКШда чекесинде куйругу бар өзгөчө күчүк жашайт

АКШда маңдайында куйругу бар күчүк табылды. Бул тууралуу чет элдик басылмалар жазып чыгышты.

АКШнын Миссури штатында ыктыярчылар көчөдөн чекесинде куйругу бар күчүктү табышкан. Анын маңдайындагы "куйругу" жалгыз мүйүздүү жаныбарды (единорог) элестеткендиги үчүн Нарвал деп аташкан. Күчүктү бирөөлөр көчөгө таштап кетиши мүмкүн деген божомол бар. Үшүп калбоонун айласын кылып Нарвал картайган итке жабышып жүргөн. Ошентсе да бир бутун үшүккө алдырып койгон. Ыктыярчылар көчөдө калган эки итти тең жаныбарлардын баш калкалоочу мекемесине алып барышкан. Анын өзгөчө "куйругун" мал доктурга көрсөтүшсө, күчүктүн дени сак экенин жана кабатырга себеп жоктугун билдиришкен.

Нарвалдын сүрөтүн социалдык тармактарга жүктөшкөндө, ага "жуучу" түшкөндөр көп болгон. Бирок мекеменин кызматкерлери күчүктүн абалына дагы жакшылап назар салышы керектигин айтып, багып алабыз дегендерге берген эмес.

Автор: Гүлжамал Абылкасымова