Поп падышасы Майкл Жексон тирүүбү? Күйөрмандары ДНК-тест талап кылышууда

Поп падышасы аталган Майкл Жексондун күйөрмандары анын келбетин алып жүргөн Серхио Кортестин ДНК-тест тапшыруусун талап кылышууда. Ага Серхио Кортестин дүйнө жүзүнө атактуу болгон маркум Майкл Жексонго коёндой окшоштугу себеп болууда. Бул тууралуу чет элдик басылмалар жазышууда.

Маалыматта айтылгандай, күйөрмандары Серхио Кортести Майкл Жексонду туурап жүргөн артист эмес, каза болду делген поп падышанын дал өзү деп шек санашууда. Күйөрмандарынын мындай оюна Серхио Кортестин Инстаграмдагы жеке баракчасына жүктөгөн видеосу себеп болгон. Видеодо Серхио Кортес Таиланддагы жеке концерти кандай өткөндүгүн айтып берген.

Видеого анализ кылган күйөрмандарынын көпчүлүгү поп падышасы Майкл Жексон тирүү болушу мүмкүн дешкен. Айрымдары Серхионун бир топ эле жаш көрүнөрүн айтышып, андан испан акценти билинип тургандыгын да баса белгилешкен.

Белгилей кетсек, Серхио Кортес испаниялык артист. Ал 30 жылдан ашуун убакыттан бери Майкл Жексондун экинчи түгөйү катары белгилүү. Анын келбети жана кебетеси атактуу Майкл Жексонго кудум окшош. Ошондой эле анын үнү, бийлегени чыныгы Майклдан эч айырмаланбайт. Керек болсо, Майкл Жексон көзү тирүү кезинде экөөнүн окшоштугуна таң берчү. 1994-жылы Серхио Кортес Майкл Жексондун суранычы менен терезеден кол булгап, күйөрмандарын алаксытып турган. Ал эми бул учурда чыныгы Майкл Лизе Мари Преслиге баш кошкон.

Автор: Сезим Жумагулова