Шайлоо жана референдум өткөрүү боюнча борбордук комиссиясы Жогорку Кеңештин депутаттарын кайра шайлоонун мөөнөтүн белгилөө жана уюштуруу боюнча жыйын өткөрдү. Бул тууралуу БШКдан билдиришти.
Анда Борбордук шайлоо комиссиясы шайлоонун мөөнөтү шайлоо мыйзамдарына өзгөртүүлөр киргенден кийин гана белгиленерин айтышканы маалымдалат.
"БШК кайра шайлоону өткөрүүдөн мурда парламентте жарандардын кызыкчылыгын көрсөтүүчү саясий күчтөргө мыйзам чегинде укуктук шарттарды түзүп бериши керек деп эсептейт. Буга байланыштуу БШК Жогорку Кеңештин 6-чакырылышындагы депутаттарына төмөндөгүдөй сунуштарды кыска мөөнөттүн ичинде карап берүүсүн суранып кайрылган:
• Шайлоо босогосунун пайызын жана шайлоо фондуна төлөнүүчү күрөөнүн көлөмүн азайтуу боюнча;
• Шайлоо участкасын алмаштыруу маселеси (форма-2). Бул форма боюнча арыздарды кабыл алууда бир катар чектөөлөрдү киргизүү сунушталат (мисалы, шайлоо участкасын өзгөртүүдө бир облустун чегинен чыкпоо, форма-2 боюнча арызды кабыл алууну шайлоого 30 күн калганда токтотуу);
• 4-октябрда өткөн шайлоонун жыйынтыгын жараксыз деп таанууга себеп болгон саясий партиялардын кайра шайлоого катышуусун мыйзам чегинде жөнгө салуу боюнча;
"Жыйындын алкагында Жогорку Кеңешке депутаттарды шайлоонун укуктук жана уюштуруучулук аспектилери талкууланды. Шайлоо мөөнөтү белгиленгенден кийин ал 2 айлык убакыттын ичинде өтүшү керек. БШК мүчөлөрү кайра шайлоону 2020-жылдын 20-декабрына чейин өткөрүүнү максатка ылайыктуу деп эсептейт. Бул өз кезегинде шайлоонун жыйынтыгын 2020-жыл аяктагыча чыгарууга мүмкүндүк берет" деп жазылат маалыматта.
Маалым болгондой, кайра шайлоону өткөрүүдө анын жүрүшү бир катар айырмачылыктар менен өтөт. Алсак, шайлоо өнөктүгүнүн убактысы кыскартылат. Кайра шайлоону өткөрүү боюнча чечим кабыл алынгандан кийин 2 календардык күндөн кечикпей ЖМКларга бул тууралуу жарыяланат.
