Республикалык штаб: "Дарыгердин уруксаты жок антибиотиктерди колдонбоңуз"

Дарыгердин көрсөтмөсү жок антибиотиктерди өз алдынча колдонууга болбойт. Бул тууралуу республикалык штабдан билдиришет.

Маалыматка ылайык, антибиотиктер дарыгердин рецепти менен гана сатылышы керек.

Антибиотиктер кандай зыян келтириши мүмкүн?

• Аллергиялык реакциялар жана башка күчөгөн, анын ичинде оор жана өмүргө коркунуч туудурушу мүмкүн. Айрым учурда өлүмгө чейин алып барат. Анафилактикалык шок, Квинкенин шишиги 1 таблетканы ичкенден кийин да пайда болушу мүмкүн.
• Ичеги микрофлорасынын бузулушу.
• Бактериялардын туруктуу штаммдарынын көбөйүшү жана таралышы.

Бейтаптар үчүн эскертме:

• Эч качан өз алдынча дарыланбаңыз!
• Дарыгердин уруксаты жок антибиотиктерди колдонбоңуз.
• Вирустук инфекцияларды дарылоо үчүн антибиотиктерди ичпеңиз, вирустарга таасир этпейт.
• Ооруну алдын алуу үчүн антибиотиктерди колдонууга болбойт.
• Айыга баштаган учурда антибиотикти ичүүнү токтотпостон, дарыгер жазып берген дарылоо курсун толук бүтүрүү керек
• Дарыгер жазып берген антибиотиктин дозасын өз алдынча алмаштырууга болбойт.
• Эгерде дарылоо курсу аяктап, ал эми антибиотик калып калса, калдыктарын “кымбат болчу, калтырып койгум келбейт” деп ичип түгөтүүнүн кажети жок.
• Сизге жазылган антибиотикти башка адамдарга бербеңиз.

Эске салсак, буга чейин дарыгердин көзөмөлү жок өз алдынча антибиотик ичип дарыланган аял киши каза болгону айтылган.

Автор: Айжанар Рыспек кызы
Фото: Интернеттен алынды