Ноокатта сүттөй аппак болуп аккан суу: Арал айылындагы суунун курамында химиялык заттар чыккан жок

Ош облусунун Ноокат районундагы Арал айылынан агып өтүүчү Кыргыз-Ата суусу булганган, бирок курамында химиялык заттар чыккан жок. Бул тууралуу Ноокат районунун акими Данияр Иманалиевге байланышканыбызда билдирди.

Анын айтымында, аталган ишкананын (ред.: "Мрамор-Стоун" жоопкерчилиги чектелген коому) ишмердүүлүгү токтотулду.

"Атайын түзүлгөн комиссия жерине барып көрүп келдик. Таш кесүүчү ишкананын тиешелүү документтери жок болуп чыкты. Комиссиянын курамындагы ар бир орган акт түзүп, аталган ишкананын шмердүүлүгү токтотулду.

Мамлекеттик экологиялык жана техникалык инспекциясынын корутундусуна ылайык, суу булганганы аныкталды. Ал эми санитардык-эпидемиологиялык кызматы суунун курамында химиялык заттар жок деген тыянак чыгарышты. Тактап айтканда, суу булганды ичкенге жарабайт, бирок курамында химиялык заттар жок.

Комиссиянын жыйынтыгы 2-3 күндүн ичинде чыгып калат", - деди Иманалиев.

Буга чейин SUPER.KG порталынын "Элдик кабар" бөлүмүнө Ош облусунун Ноокат районунун тургуну кайрылып, ичүүчү суунун тазалыгына кабатыр болуп жатканын билдирген. Тургун "ичүүчү суу алган дарыя сүттөй аппак болуп агып жатат" деп видеосун дагы жөнөткөн. Ал эми Ноокат районунун акими Данияр Иманалиев суу эмнеден улам булганганын айткан.

Мамлекеттик экологиялык жана техникалык инспекциясынан лабораториялык изилдөөлөрдү жүргүзүп жатканын маалымдашкан. Атайын текшерүүлөрдүн негизинде дарыядагы суунун булганышына Арал айылында иш алып барган таш кесүүчү ишканадан чыккан саркындылар себеп болгону аныкталган.

Жергиликтүү тургундар президенттин Ош облусундагы ыйгарым укуктуу өкүлүнө таш кесүүчү ишкананын ишмердүүлүгүнө нааразы болуп, арыз менен кайрылышкан.

Автор: Айжанар Рыспек кызы