"Бишкекжарыктын" кызмат адамдарына кылмыш иши козголду

Бишкек шаардык прокуратурасы тарабынан “Бишкекжарык” муниципалдык ишканасында бюджет жаатындагы мыйзамдардын аткарылышы текшерилди. Бул тууралуу Башкы прокуратуранын басма сөз кызматынан билдиришти.

Маалыматка ылайык, "Бишкекжарыктын" жооптуу кызмат адамдары тарабынан бюджеттик мыйзамдардын талаптары бузулуп, ишканадагы товардык-материалдык баалуулуктар системалык түрдө жүргүзүлбөгөндүгү аныкталып, жетишсиздик 27 миллион 189 миң 678 сомду түзүп, мамлекетке өзгөчө ири өлчөмдө зыян келтирилген.

Бул факты боюнча Бишкек шаардык прокуратурасы тарабынан Кылмыш-жаза кодексинин 337-беренеси (кызмат абалын кыянаттык менен пайдалануу) жана 210-беренеси (ишенип берилген мүлктү ыйгарып алуу же коротуу) менен кылмыш иши козголуп, шаардык прокуратура тарабынан тергөө амалдары жүргүзүлүүдө.

Автор: Жылдыз Джускембаева