Бишкектин мэри: "Шаарда 104 кичи автобустук каттамды менчик ташуучулар тейлейт"

Бүгүн, 22-февралда Жогорку Кеңештин комитетинин жыйынында депутаттар Бишкек шаарынын мэринин калаадагы жол-транспорт жана курулуш иштери боюнча маалыматын укту.

Бишкек шаарынын мэри Айбек Жунушалиев өз сөзүндө шаардык муниципалитеттин ишинин негизги багыттарына, транспорт жана курулуш тармагындагы долбоорлорду ишке ашыруу маселелерине токтолду. Ошондой эле коомдук транспорт тууралуу сөз кылган калаа башчысы учурда жүргүнчүлөрдү ташуу иши муниципалдык ишканалар менен бирге менчик жүк ташуучулар тарабынан жүргүзүлүп жатканын билдирди.

“Бишкек шаарындагы 104 кичи автобустук каттамды менчик ташуучулар тейлейт, алар күн сайын каттамдарга 1300-1700 кичи автобустарды чыгарышат. Ошол эле учурда кошумча 1500-1700 автобусту киргизүү зарылчылыгы бар. Андыктан коомдук транспортту сатып алууга жергиликтүү бюджеттен 1 миллиард 500 миллион сом каралган”, – деди ал.

Автор: Жылдыз Джускембаева