Бишкекте 4-класстын окуучусу сабалып, ооруканага кайрылды. Аны сабаган кыздын апасына айып пул салынды

Социалдык тармакка кыздардын урушуп жаткан видеосу тарады. Андан бир кыз экинчи кызды башынан кармап алып, тизелеп тээп жатканын көрүүгө болот.

Бишкек шаарынын Октябрь РИИБинен окуя 18-апрелде болгонун кабарлады. Анда милициянын нөөмөт бөлүмүнө №3 балдар ооруканасынан билдирүү түшкөн.

"12 жаштагы Ж.М. гематома диагнозу менен ооруканага кайрылган. Жерине ыкчам тергөө тобу барганда борбор калаадагы мектептин 4-классынын окуучусу денесинен жаракат алганы белгилүү болгон. Окуучунун апасы арыз жазган.

Бул факты электрондук журналга катталып, тергөө иштери башталган. Ал эми жабырлануучунун алган жаракаты боюнча тиешелүү соттук-медициналык экспертизалар дайындалган.

Андан тышкары тергөө кызматына 11 жаштагы Ч.А. апасы менен күбө катары чакыртылып, сурак берген. Аларга профилактикалык түшүндүрүү иштери жүргүзүлгөн. 11 жаштагы окуучунун апасына 102-берененин (ата-энелик жоопкерчиликтен качуу) негизинде протокол түзүлүп, 1000 сом айып салынды.

Бул окуя боюнча топтолгон материалдардын көчүрмөсү Октябрь райондук администрациясынын балдар иштери боюнча комиссиясына жөнөтүлдү", - дешет маалымат кызматынан.

Белгилей кетсек, Кыргыз Республикасынын Кылмыш-жаза кодексинин 28-беренесинин 1-бөлүгүнүн (Кылмыш-жаза жоопкерчилигине тартуу курагы) негизинде 16 жаштан жогорку курактагы адам кылмыш-жаза жоопкерчилигине тартылууга тийиш.

Автор: Бактыгүл Момбекова