Өспүрүм кызга жыныс мүчөсүн көрсөткөн жарандын иши боюнча материалдар сотко өткөрүлдү

Чүй облусунда 15 жаштагы кызга сексуалдык мүнөздөгү аракет жасаган жарандын иши боюнча тиешелүү материалдар топтолуп, сотко жөнөтүлдү. Бул туурасында бүгүн, 24-майда облустук ички иштер башкы башкармалыгынан кабарлашты.

Маалым болгондой, ушул жылдын март айында Москва РИИБине өспүрүмгө карата ыплас иш-аракет болгондугу туурасында билдирүү түшкөн. Тагыраагы, дүкөнгө кирген киши 15 жаштагы кызга жыныс мүчөсүн көрсөткөнү айтылган. Өспүрүм кыздын жакындарынын арызы Кылмыштардын бирдиктүү реестрине 158-берене (адепсиз жоруктар) менен каттоого алынган.

"Сотко чейинки тергөө иштеринин жүрүшүндө шектүү катары 1987-жылы туулган К.С. кармалып, Москва райондук соту тарабынан үй камагына чыгаруу бөгөт чарасы тандалган.

Аталган окуя боюнча тергөө иштери Москва РИИБи тарабынан апрель айынын соңуна чейин жүргүзүлүп, 29-апрелден баштап Москва райондук прокуратурасы уланткан. Учурда тергөө иштери аяктап, топтолгон материалдар андан аркы териштирүү үчүн сотко жөнөтүлдү", - дешти маалымат кызматынан.

Буга чейин Чүйдүн Петровка айылында дүкөнгө кирген кардар сатуучу кызга жыныс мүчөсүн көрсөткөн видеосу социалдык тармактарга жарыяланган.

Автор: Бактыгүл Момбекова