Садыр Жапаров: “Кыргыз-тажик чек арасы жаңы жылга чейин такталат”

Кыргыз-тажик чек арасы жаңы жылга чейин такталат. Бул тууралуу Жогорку Кеңештин бүгүнкү, 17-ноябрдагы жыйынында президент Садыр Жапаров билдирди.

Мамлекет башчысы Өзбекстан менен чек ара маселесине чекит коюлганын билдирип:

“Эми, Кудай буйруса, Тажикстан менен чек ара тилкелерибизди тактайбыз. Тоскоолдуктар болбосо жаңы жылга чейин бүтүрүп, алып келебиз”, - деди ал.

Жапаров Кыргызстан коңшу өлкөлөр менен ынтымакта, достукта жашап, октон бир дагы жоокер каза болбошу керектигин белгиледи.

“Өлкөнүн аянты 199 миң чарчы чакырым болсо, чек араны тактагандан кийин 210 миңден ашык чарчы чакырым болуп, картабыз чоңоёт. Тажикстан менен чек ара чечилгенден кийин Кыргызстанды бүтүн, коопсуз деп айтсак болот. Азыр биз жарты Кыргызстанбыз, 30 жылдан бери кескилеп жатып, жарты кылып салышкан. Баарын кайтарып, бүтүн кылып жатабыз”, - деди Жапаров.

Автор: Максуда Кудайбердиева