Бишкектин Жукеев-Пудовкин көчөсүндөгү гараждарды алуу иштери башталды

Бишкектин Жукеев-Пудовкин көчөсүнүн боюнда жайгашкан №12 гараждык кооперативди демонтаждоо иштери башталды. Бул тууралуу Бишкек мэриясынын маалымат кызматынан билдиришти.

Маалымдалгандай, жеринде вице-мэр Нурдан Орунтаевдин жетекчилиги астында Бишкек шаарынын мэриясынын жер пайдаланууну көзөмөлдөө башкармалыгынын кызматкерлери "Тазалык" муниципалдык ишканасынын атайын бөлүмү менен биргеликте иш алып барууда.

Муниципалитеттен белгилешкендей, учурда 4 гараж алынды. Калган гараждардын ээлери объекттерди жеке буюмдарынан бошотууда.

Белгилей кетсек, гараждык кооператив тарабынан муниципалдык аймакты пайдалангандыгы үчүн ижара акысы төлөнгөн эмес.

Эске салсак, жогорудагы жер тилкеге биринчи жолу муниципалдык көп кабаттуу унаа токтотуучу жайды куруу пландалууда. Ошондой эле бул жерде футбол аянтчасы, воркаут аянтчасы, сквер жана балдар аянтчасы курулат.

Автор: Максуда Кудайбердиева