Кыргыз куткаруучулары Түркияда урандылардын астынан тирүү чыгарган жаран боюнча маалымат

Түркияда Кыргызстандын куткаруучулары урандылардын астынан 16 жашар өспүрүмдү аман-эсен чыгарышты. Бул тууралуу Өзгөчө кырдаалдар министрлигинен билдирди.

Буга чейин ӨКМ кыргызстандык куткаруучулар издөө-куткаруу иштерин жүргүзүп жаткан Кахраманмараш шаарындагы имараттын урандыларынын алдынан тирүү адамды таап чыгарышканын жана кошумча маалымат берилерин билдирген.

"Кыргыз куткаруучуларына бөлүнгөн тилкедеги кыйраган имараттын урандыларынын астынан кыргыз-түрк биргелешкен издөө иштеринин натыйжасында аман калган адам чыгарылды. Кубанычтуу окуя Кахраманмараш шаарынын "Он эки субхат" районунда орун алды. Куткарылган адам ошол кыйраган имараттын 5-кабатында жашаган 16 жаштагы түрк жараны экени маалым болду", - деп айтылат билдирүүдө.

Белгилей кетсек, 7-февралга караган түнү Өзгөчө кырдаалдар министрлигинин 67 куткаруучусу Түркияга жер титирөөдө жабыркагандарга жардам көрсөтүү үчүн учуп кетишкен. Жекшемби күнү дагы 100 куткаруучу атайын борт менен учууга даярдык көрүүдө.

Автор: Бек Оморбеков