"Ата, биз сизди жакшы көрөбүз". Пригожиндин көрүстөнүнө кирүүгө уруксат берилди (фото)

Санкт-Петербург шаарындагы Пороховское көрүстөнү зыяратчылар үчүн ачылды. Бул тууралуу орусиялык телеграм каналдар жазышты.

Маалыматка ылайык, дал ушул мүрзөгө Евгений Пригожин коюлган. Пригожиндин мүрзөсүнө коюлган тогуз гүлчамбардын бирин маркумдун балдары калтырышкан. Анда "Ата, биз сизди абдан жакшы көрөбүз. Поля, Паша, Ника" деген жазуу бар. Буга чейин Пригожиндин эки баласы Полина менен Павел бар экени белгилүү. Ал эми Ника деген ким экени белгисиз.

Ошондой эле көрүстөнгө "Вагнерчилердин" атынан дагы гүлчамбар коюлган.

Эске салсак, 23-августта Тверь облусунда "Вагнердин" негиздөөчүсү Пригожинге караштуу учак кулап түшкөн. Ичиндеги он адамдын баары каза болгон. Росавиация жүргүнчүлөрдүн тизмесинде Евгений Пригожин да болгонун жарыялаган.

Кийинчерээк Пригожиндин сөөгү өлүкканадан таанылганы айтылган.

Автор: Азат Бейшенбеков