Адахан Мадумаров ооруканага жаткырылды

Жогорку Кеңештин депутаты, "Бүтүн Кыргызстан" фракциясынын лидери Адахан Мадумаров ооруканага жаткырылды. Бул тууралуу бүгүн, 26-октябрда депутат Гуля Кожокулова билдирди.

Ал Мадумаровдун көптөн бери ден соолугуна байланыштуу кыйналып жүргөнүн жана анын кардиологияга которулганын билдирди.

Белгилүү болгондой, УКМКнын СИЗОсунун башчысы Саламаттыкты сактоо министрлигине жазуу жүзүндө арыз менен кайрылган.

Буга чейин да саясатчынын абалы начарлап, УКМКнын ооруканасында текшерилүүдөн өткөнү кабарланган болчу.

Адахан Мадумаров 2-сентябрда камакка алынган. Ага 2009-жылдагы протоколго ылайык, Кылмыш-жаза кодексинин "Мамлекетке чыккынчылык" беренеси боюнча айып тагылган. Сот депутатты эки айга камакта калтырган.

Эскерте кетсек, Башкы прокуратура Адахан Мадумаровду 2009-жылы кыргыз-тажик чек арасы боюнча протоколго кол койгону үчүн жоопко тартууга уруксат сураган. Депутаттык комиссия эл өкүлүнө коюлган төрт берененин бири, Кылмыш-жаза кодексинин 338-беренеси (Бийликтен аша чабуу) менен жоопкерчиликке тартууга макулдук берген.

Мадумаров Коопсуздук кеңешинин катчысы болуп 2008-2009-жылы бир жыл иштеген. Ошол маалда Ош - Баткен - Исфана жолун оңдоо жана көпүрө куруу үчүн 275 метр узундуктагы беш гектар жерди тажик тараптан 49 жылдык мөөнөткө ижарага алуу боюнча протоколго кол койгон. Депутат бул документ юридикалык күчкө ээ эмес экенин айтып келет.