Бишкектин мурдагы вице-мэри Азамат Кадыров эки айга камалды

Бишкектин мурдагы вице-мэри Азамат Кадыров эки айга камалды. Бул тууралуу 24-сентябрда калаанын Ленин райондук соту билдирди.

Маалыматка караганда, ал тергөө аяктаганга чейин, тактап айтканда, 20-ноябрга чейин УКМКнын тергөө абагында кармалат.

Буга чейин Кадыровдун кармалганы айтылып, бирок кайсы берене боюнча айыпталып жатканы такталган эмес.

Эске салсак, Азамат Кадыров 2023-жылдын ноябрынан тарта Бишкек шаарынын вице-мэри болуп иштеген. Ал жер пайдалануу, архитектура, курулуш жана санариптештирүү тармактарын тейлеген. Кадыров ушул жылдын 15-июнунда башка жумушка өткөндүгүнө байланыштуу кызматтан кеткен.

Автор: Айжанар Рыспек кызы