Бишкекте курулуш компаниясынын директору алдамчылыкка шектелип кармалды

Бишкек шаарында курулуш компаниясынын башкы директору алдамчылыкка шектелип кармалды. Бул тууралуу бүгүн, 12-ноябрда шаардык милициядан билдиришти.

Маалым болгондой, шектүү жабырлануучуга курулуп жаткан көп кабаттуу үйлөрдүн биринен эки бөлмөлүү батир берүүнү убада кылып, 2 миллион 924 миң 986 сом акчасын алган. Бирок бүгүнкү күнгө чейин убада кылынган батир берилбей, акча каражаты да кайтарылган эмес.

Бул факт боюнча Кылмыш-жаза кодексинин 209-беренеси (Алдамчылык) менен кылмыш иши козголгон. Ыкчам-издөө иш-чараларынын жүрүшүндө 39 жаштагы шектүү кармалып, №1 тергөө абагына киргизилди. Учурда тергөө амалдары жүргүзүлүүдө.

Милиция жарандарды курулуш компаниялары менен келишим түзүүдөн мурда алардын документтерин жана ишмердүүлүгүнүн мыйзамдуулугун кылдат текшерүүгө чакырат.

Автор: Меерим Кабылова